Самыя “беларускамоўныя” на Віцебшчыне – “Герой працы” і “Вольнае Глыбокае”
Абласная рада ТБМ падвяла вынікі конкурсу “З родным словам”, да ўдзелу ў якім былі запрошаны ўсе друкаваныя СМІ вобласьці.
Як распавёў старшыня абласной рады ТБМ Іосіф Навумчык, гэты конкурс мусіў стымуляваць выкарыстаньне роднай мовы ў перыядычным друку. Ён распачаўся зь 1-га студзеня гэтага году, і 3-га траўня, у Сусьветны дзень незалежнай прэсы, журы вызначыла пераможцаў.
Паводле ўмоваў спаборніцтва, дасланых у рэдакцыі як дзяржаўных, так і незалежных газэт яшчэ напрыканцы 2008 году, журы прааналізавала, наколькі часта выданьні зьмяшчаюць беларускамоўныя матэрыялы. Улічвалася таксама наяўнасьць беларускамоўных публікацый у літаратурных старонках ды ў разьдзелах прыватных паведамленьняў – рэклямы ды аб’яваў.
– Найбольш уразіла журы, у якое ўваходзілі і актывісты ТБМ, і журналісты, і пісьменьнікі, Шумілінская “раёнка” “Герой працы”, – распавядае Іосіф Навумчык. – Там ня толькі амаль заўжды пішуць па-беларуску самі журналісты, але нават выступы загадчыка ўправы ідэалягічнай работы аблвыканкаму Міхаіла Кузьміча перакладаюць на беларускую мову.
Але першае месца мы вырашылі падзяліць – апрача шумілінскай, адзначыць яшчэ й “раёнку” “Браслаўская звязда”, дзе таксама друкуецца багата матэрыялаў па-беларуску.
Другое месца журы прысудзіла “Мёрскім навінам” і “Пастаўскаму краю”, трэцяе – “Дняпроўскай праўдзе” з Дуброўна. Дарэчы, спаміж недзяржаўных газэт першае месца таксама атрымала рэгіянальнае выданьне – “Вольнае Глыбокае”.
Гарадзкая недзяржаўная газэта “Витебский проспект”, як і дзяржаўная гаарадзкія ды абласныя “Аршанская газета”, “Віцьбічы”, “Народнае слова”, “Віцебскі рабочы” і наваполацкая “Новай газэета” зьмяшчаюць напісаныя па-беларуску матэрыялы даволі рэдка. З усіх газэт гарадзкога маштабу журы прызнала пераможцам толькі “Полацкі весьнік”: у рэдакцыі дужа адказна паставіліся да конкурсу і нават даслалі ў ТБМ адмысловы альбом зь беларускамоўнымі публікацыямі за апошнія чатыры месяцы.
– Некаторыя рэдактары кажуць, што расейская мова болей прываблівае чытачоў, але наш аналіз паказаў, што гэта далёка ня так, – разважае старшыня Віцебскай рады ТБМ. – Да прыкладу, газэта “Пастаўскі край”, дзе большасьць матэрыялаў надрукавана па-беларуску, мае самы большы наклад спаміж “раёнак”. Тым часам амаль спрэс расейскамоўны “Гарадоцкі весьнік” ці ня з самым меншым накладам у вобласьці. Таксама добра вядома, што на абласныя і гарадзкія газэты ў Віцебску проста прымушаюць падпісвацца, і таму нельга сказаць, каб колькасьць накладу тых самых “Віцьбічаў” была абумоўлена сапраўднай папулярнасьцю ў чытачоў.
Абласная рада ТБМ вырашыла адзначыць і працу асобных журналістаў – аўтараў найбольш цікавых беларускамоўных матэрыялаў. Для іх, а таксама для калектываў рэдакцый-пераможцаў падрыхтаваныя падарункі. Кнігі, перадзеныя ад Беларускай асацыяцыі журналістаў і ГА “Згуртаваньне беларусаў сьвету “Бацькаўшчына”, а таксама памятныя дыплёмы ўдзельнікі конкурсу атрымаюць па пошце цягам траўня.