Главная » BY, Витебская, Культура, Общество, Темы

У Глыбокім адсвяткавалі Дзень беларускага пісьменства

3 сентября 2012 Комментариев нет

Глыбокае такога яшчэ не бачыла. Тысячы людзей з Беларусі, блізкага і далёкага замежжа з’ехаліся ў горад. Кавярні пад адкрытым небам, атракцыёны, парашутысты, шрубалёты, поп-спевакі, жывая музыка ў розных частках горада, процьма ежы і забаваў.

Чаго і каго толькі не было 2-га верасня 2012 ў Глыбокім! Не было хіба кіраўніка дзяржавы, які не стаў парушаць традыцыю — абмінаць Глыбокае стараной.

Фота Весткі.info

Афіцыйная цэрымонія адкрыцця свята праходзіла на вялікай сцэне, якую ўсталявалі на цэнтральным пляцы горада.

Усе подступы да плошчы ахоўвалі АМАП і міліцыя. Людзей, якія праходзілі праз турнікеты, абшуквалі. Але такія надзвычайныя меры бяспекі відавочна не былі абумоўлены дбаннем пра бяспеку гледачоў, а хутчэй пра бяспеку высокіх гасцей, якія і адкрывалі свята, а пасля выканання пачэснай місіі сядзелі на першых шэрагах ля сцэны.

Калі яны сышлі, турнікеты знялі, АМАПаўцаў паменела, па плошчы можна было ўжо шпацыраваць і з бутэлькамі вады, і з парасонамі, хоць без апошніх можна было абысціся. З надвор’ем насуперак прагнозам пашанцавала. Было цёпла, нават крыху спякотна.

Вядучыя і выступоўцы на цэрымоніі адкрыцця прамаўлялі па-беларуску, на роднай мове выступалі нават афіцыйныя асобы. Старшыня аргкамітэту свята намеснік прэм’ер-міністра Анатоль Тозік па-беларуску зачытаў прывітальнае слова Аляксандра Лукашэнкі. Па-беларуску прамаўлялі старшыня Віцебскага аблвыканкама Аляксандр Косінец, глыбоцкі «мэр» Алег Морхат, біскуп Барысаўскі, вікарый Мінскай епархіі Беларускай праваслаўнай царквы Веніямін. Па-руску выступаў толькі старшыня праўладнага Саюза пісьменнікаў Мікалай Чаргінец.

Пасля гэтага выступу адбылася цэрымонія ўзнагароджання пісьменнікаў-пераможцаў Рэспубліканскага конкурсу на лепшы літаратурны твор 2012 года.

За тое на свяце было шмат кнігаў, у тым ліку і тых, якія выдаваліся ў Глыбоцкім краі. Добра былі прадстаўлены Глыбокае, Паставы, Полацк.

Другога верасня ў Глыбокім афіцыйна адкрылі алею славутых землякоў. Гэта беспрэцэдэнтная падзея для горада, якая не мае ў Беларусі аналагаў.

Побач з новым фантанам усталявалі меншую сцэну, на якой узнагароджвалі прадстаўнікоў дзяржаўнай прэсы, спявалі і танчылі прадстаўнікі народных калектываў.

Фота Весткі.info

Побач расцягнуўся вялікі павільён, прысвечаны кнігам, паліграфіі і прэсе. Быў павільён, які рэпрэзентаваў выдавецкую прадукцыю саюзнай дзяржавы.

Па ўсяму цэнтру Глыбокага былі раскіданыя падворкі. Акрамя падворкаў, прадстаўляючых ці не кожны райцэнтр Віцебшчыны, былі латышскі, польскі, армянскі, рускі, украінскі і нават габрэйскі падворкі.

У розных кутках горада гучала музыка. Выступалі, як прафесіяналы, так і аматары. Музыкі, спеваў было як ніколі шмат.

Фота Весткі.info

Розныя вуліцы разбілі на некалькі тэмаў. Так, напрыклад, па Энгельса можна было даведацца пра гісторыю пісьменнасці (ад агню да пяра).   Менавіта тут месціліся інсталяцыі і выставы Дамоў рамёстваў з розных гарадоў краю.

Фота Весткі.info

Глыбачане не хавалі сваіх эмоцыяў. Нягледзячы на аўральныя ўмовы падрыхтоўкі, свята ўдалося. І тут вялікая заслуга Алега Морхата, які ў вачах многіх глыбачанаў, стаў сапраўдным героям дня. Увечары падчас закрыцця свята удзельнікам канцэрта ўручаліся кветкі ад Косінца і Морхата. Кветкі ад глыбоцкага мэра аўдыторыя сустрэла авацыямі. Пад вечар Морхата можна было заўважыць, шпацыруючым па Глыбокаму з іншымі знанымі гасцямі.

Падрыхтоўка да свята ішла напалеонаўскімі тэмпамі. Многае не паспелі зрабіць, нават у цэнтры горада. Напрыклад, асфальт на Маскоўскай паклалі толькі часткова. Сумным напамінам аб трагедыі, якая здарылася некалькі дзён таму, калі рабочы сарваўся з даха, вянкі на месцы здарэння.

Але паспелі дастаткова шмат. І гэта застанецца гораду. Напрыклад упарадкаванае ўзбярэжжа возера Кагальнага з лаўкамі і альтанкамі. Адкрыліся новыя фантаны, з’явілася зона адпачынку для дзяцей у самым цэнтры горада, запрацаваў рэнававаны Ўнівермаг.

Крыніца: Весткі.info

Рассказать друзьям

Опубликовать в Google Plus
Опубликовать в Одноклассники
Опубликовать в LiveJournal
Опубликовать в Мой Мир
Опубликовать в Яндекс

Извините, комментирование закрыто.

Реклама от RedTram