І пачнуць фарбаваць траву. Шмат дзівосаў чакаецца тут у год роднай зямлі. Гораду пашчасьціла трапіць пад апеку дзяржаўнай праграмы азеляненьня 30 райцэнтраў, сярод якіх таксама Слуцак, Нясьвіж, Слонім, Рэчыца, Крычаў і іншыя.

Старшыня Бабруйскага гарвыканкаму Зьміцер Бонахаў незадаволены колерам травы ў горадзе. На нядаўняй плянёрцы мэр яшчэ раз папярэдзіў, што спэцыялісты камунальнай гаспадаркі мусяць да пачатку вясны наведацца ў Менск, каб «пераняць сталічны досьвед у захаваньні вечназялёнымі газоны ля чырвонага дому на Карла Маркса, 38».

Пра сутнасьць прэтэнзіяў бабруйскага гораданачальніка да колеру травы даведваюся на прадпрыемстве «Бабруйскі жылкамунгас». Там тлумачаць, што ў Бабруйску трава сохне і набывае жоўты колер ад солі, якой і цяпер багата высыпаюць на вуліцы ў галалёд.

– Давядзецца шукаць іншы гатунак, – паведаміў тутэйшы майстар азеляненьня Алег Здрок, – інакш прымусяць нейкім чынам падфарбоўваць газоны на вуліцах, па якіх езьдзіць начальства.

Усьлед за мэрам Бабруйску свае патрабаваньні да эколягаў агучыў і кіраўнік Ленінскага раёну Міхаіл Загорцаў.

– На азеляненьне накіроўваюцца мільярды рублёў, – кажа ён, – і калі ў найбліжэйшы час сытуацыя не зьменіцца, то мы будзем змушаныя прыцягваць іншыя, магчыма, прыватныя арганізацыі, якія здольныя праводзіць азеляненьне якасна, у тэрмін і нават за меншы кошт. Ніхто за гэта нас не папракне, бо перадусім будзем эканоміць бюджэтныя сродкі.

Даведваюся, што ў год роднай зямлі Бабруйску пашчасьціла трапіць пад апеку дзяржаўнай праграмы азеляненьня 30 гарадоў, сярод якіх таксама Слуцак, Нясьвіж, Слонім, Рэчыца, Крычаў і іншыя. Дакумэнты дапамогі патрабуюць разьліку патрэбнай колькасьці зялёных насаджэньняў на цяперашні час і на пэрспэктыву. Таксама, цытую: «патрабуецца, што мясцовая ўлада вызначае штогадовы аб’ём працы па стварэньні зялёных насаджэньняў у мэтах дасягненьня горадабудаўнічых нормаў».

Бабруйск на сёньня найвялікшы райцэнтар ў Беларусі, мае 220 тысяч насельніцтва. Да гэтага часу тут ужо адбыліся «Дажынкі» і збудаваны лёдавы палац, дакладней, спартыўны комплекс «Бабруйск-Арэна». Як любіць паўтараць мэр Бонахаў, «гэта найбольшае ў Беларусі спартыўнае збудаваньне з эўрапейскай тэхнічнай аснашчанасьцю».

Каб добраўпарадкаваць тэрыторыю ля «Бабруйск-Арэны», давялося пераараць 30 гектараў, наняць часова 100 працаўнікоў, спустошыць гадавальнікі дэкаратыўных дрэў, кустоў і кветак.

Як жа «Бабруйскзелянгас», а таксама «Бабруйскжылкамунгас» і спэцыялісты па ляндшафту прадпрыемстваў і арганізацый будуць пераўтвараць флёру горада сёлета?

– Усе сілы цяпер кінутыя цяпер на абрэзку дрэваў, – паведамляе намесьнік дырэктара «Бабруйскзелянгасу» Аляксандар Наркевіч, – апрацоўка аднаго дуба з дыямэтрам ствала каля 50 сантымэтраў патрабуе 200 тысяч рублёў. А калі яшчэ выкарыстоўваецца абрэзка для амалоджваньня дрэва, то мала і паўмільёна рублёў. Сэзон – да другой палавіны красавіка.

Раней Бабруйск называлі горадам таполяў. Карэннае габрэйскае насельніцтва лічыла гэтыя хуткасьпелыя дрэвы выратаваньнем чысьціні паветру ад выкідаў дрожджа-вінакурнай і алейнай фабрык, ганчарняў, гарбарнага камбіната, кафлянай мануфактуры і т.п. і г.д. Бабруйск цяпер – горад крытычнай экалёгіі.

– За апошнія 12 гадоў высечаны дзясяткі тысяч таполяў, – інфармуе Аляксандар Наркевіч, – сёлета іх не застанецца ўвогуле.

Каштанам, ліпам, клёнам і бярозам саступаюць свае месцы старыя бабруйскія таполі. Няма, напэўна, прычыны спрачацца зь гэтым. Але існуе дакладны ўлік, што зь 10 тысяч пасаджаных у Бабруйску дрэў скрадзена 250 і яшчэ амаль тысяча былі зламаныя і засохлі. А ў мінулы год былі скрадзеныя кветкі і дрэўцы нават пад вокнамі будынку адміністрацыі Першамайскага раёну.