У Брэсце ўдзельнік аматарскага забегу ўжыў допінг
Тое засведчыў сам спартовец – вядомы апазыцыянер. А здарылася ўсё падчас ХХІ прабега памяці загінулых у Афганістане брэстаўчанаў.
Уладзімір Малей з Маларыты стартаваў на 10 кіламетраў у бел-чырвона-белай форме з гербам і надпісам «Пагоня», а фінішаваў з вялікім бел-чырвона-белым сцягам.
Спадар Малей сказаў, што калі пасля дзевяці кіламетраў атрымаў у рукі «бел-чы-бел», дык сілы быццам падвоіліся.
Цяпер трэнеры Малея абмяркоўваюць, ці не даць яму наступным разам двайны «допінг», каб сілы ўчацьвярыліся.
Браў удзел у Брэсцкім забегу і стаер з Жодзіна Андрэй Караленка (75 гадоў).
– Гэты марафон у Брэсце я заўжды бягу ў чорнай форме, а бел-чырвона-белая карта Беларусі на грудзях мае чорную стужку, – сказаў спадар Караленка. – Афганская вайна гэта чорная старонка ў гісторыі нашай краіны, і слава Богу, што беларусам не трэба ехаць ваяваць кудысь за мяжу.
У Афганістане загінула 19 жыхароў Брэста.