Слуцкі райвыканкам не супраць правядзення мітынгу, прысвечанаму Слуцкаму збройнаму чыну, але патрабуе аплаціць яго.

Актывіст мясцовай філіі БНФ “Адраджэнне” Амяльковіч Віталь падаў у Слуцкі райвыканкам заяву на правядзенннне 28 лістапада мітынгу, прысвечанага памяці слуцкіх паўстанцаў. У мінулым годзе яму было адмоўлена ў правядзенні аналагічнага мерапрыемства ў цэнтры горада каля краязнаўчага музея. Сёлета малады чалавек вырашыў падстрахавацца. Ён падаў дзве заяўкі на правядзенне мітынгу ў розных месцах і ў розны час: каля краязнаўчага музея і на гарадскім стадыёне.

Рашэннем Слуцкага райвыканкама месцам для правядзення масавых мерапрыемстваў у горадзе з’яўляецца гарадскі стадыён, які знаходзіцца недалёка ад будынка музея. У мінулым годзе актывісту не дазволілі правесці мерапрыемства нават на стадыёне ў “сувязі з запланаваным спартыўным мерапрыемствам”. На самай справе, ніякія мерапрыемствы ў той дзень не праводзіліся, а на самым стадыёне ляжаў снег.

На гэты раз слуцкае кіраўніцтва дало згоду на правядзенне мітынгу на гарадскім стадыёне.  Магчыма, яно памякчэла ў сувязі з эканамічным крызісам, які сур’ёзна закрануў горад. У адказе райвыканкама ад 20.11.2009г. за подпісам Даўгучыца П. Б., які выконвае абавязкі старшыні райвыканкама, арганізатару прапануецца забяспечыць ахову грамадскага парадку, медыцынскае абслугоўванне і прыбіранне тэрыторыі пасля правядзення мерапрыемства. Адпаведна, спадару Амяльковічу давядзецца заключыць дамовы з раённым аддзелам унутраных спраў, УЗ “Слуцкая цэнтральная бальніца”, КУП “Слуцкае ЖКХ” і аплаціць іхнія  выдаткі.

Цяпер актывіст раіцца з кіраўнікамі сваёй арганізацыі і цікавіцца прэйскурантам на паслугі адзначыных арганізацый.