Хуткі “Парыж – Масква” зноў зарэзаў у Аранчыцах
Цягнік, які праходзіць станцыю на хуткасці звыш ста кіламетраў на гадзіну, перад Новым годам разнёс на мяса пенсіянера. Зараз ён накрыў чараду з трох сабак.
- Магчыма, акурат тых, што цягалі парэшткі няшчаснага чалавека, – кажа Міхаіл, жыхар пасёлка Лінова, які прылягае да станцыі. – Але адзін дык надта сімпатычны сабака быў”.
Цягнік імчыць на злом галавы...
Беларускія рэгіянальныя навіны паспрабавалі высветліць дадатковыя абставіны здарэнняў і звязаліся па тэлефоне з начальнік станцыі. Мужчына назваць сябе адмовіўся, але апынуўся ветлівым суразмоўцам:
- Дык не толькі “Масква – Парыж”. І гэты швейцарскі, “Рэгіянальныя лініі”, таксама імчыць на злом галавы. Да 140 кіламетраў набірае. Куды спяшацца, навошта? Для хуткасці ёсць самалёты! Навошта цягнікам падкручваць хуткасць?
Аднак і чалавечы фактар нельга не ўлічваць:
– Ва ўсім вінаваты самі людзі. Безуважныя. Музыку слухаюць, аб’явы па станцыі не. Ім кажуць: “Па першай каляіне будзе праходзіць хуткі”. Дык яны спрабуюць перад яго носам прашмыгнуць! – працягвае начальнік пра трагічнае здарэнне 25 снежня 2011.
- І насі потым тое мяса, а гэта зусім не мая праца. Вось таго пенсіянера з Мінска гэта я па кавалках і мусіў збіраць. Я збіраю, а пасажыры глядзяць. Дык толькі так і можна навучыць іх, на канкрэтных прыкладах. Вось, і з табою такое будзе, калі не будзеш зважаць. Ён жа з жонкай ехаў. Дык тая сама прызнала, што ён стараваты ўжо быў, сэрца варухлівае, і кульгаючы хадзіў, і глухаваты яшчэ, – дык не, не ўзяла пад руку, не перавяла праз пераход, паперлася наперад, а ён сунуўся памалу, потым і наогул стаў пасярод каляіны, каб запаліць… Машыніст сігналіць, але дзе там…
Вось, хуткасці на чыгунцы ўзраслі. Тады чалавек загінуў, зараз сабак пабіла, а ці магчыма неяк абгарадзіць, тунэль збудавац альбо мосцік, пытаюся:
- А Вы ў Баранавічах бачылі мосцік? Нязручна верхам багаж цягаць. Людзі самі вінаватыя ва ўсім, што з імі на чыгунцы здараецца. Трэба, каб зважалі.
Можа, яно і так. Але давайце пазважаем на лічбы. Вось статыстыка Упраўлення ўнутраных спраў на транспарце за тры дні (з 30 снежня 2011 па 2 студзеня 2012 года). На чыгунцы зафіксавана пяць выпадкаў траўмавання людзей, тры з іх з летальным сыходам. 1 студзеня каля Маладзечна машыніст электрапоезда знайшоў труп 20-гадовага мясцовага жыхара. Каля Лунінца грузавы цягнік насмерць збіў мужчыну 38 гадоў. Перад Новым годам электрацягнік Асіповічы – Мінск збіў п’янага 51-гадовага гамельчука. У выніку пералом пляча, выцятая грудзіна, бальніца. 2 студзеня ў Брэсце “пры выхадзе з вагона з-за ўласнай няўважлівасці упаў паміж вагонам і перонам” 6-гадовы школьнік з Пінскага раёна”. Вынік, як паведамляецца: закрытая чэрапна-мазгавая траўма, пабітыя патыліца, ніжняя губа і верхняя сківіца, няпоўны вывіх трох зубоў.
Вось і атрымліваецца, што ўсе здарэнні на сумленні пацярпелых, а поспехі і дасягненні – заслуга кіраўнікоў.
Крыніца: Беларускія рэгіянальныя навіны
Рассказать друзьям
Оставить комментарий