У Дзень Волі горад Слуцк упрыгожвалі самаробныя бел-чырвона-белыя сцяжкі

26 марта 2012 Марыя Верас 3 комментария

Бел-чырвона-белыя сцяжкі былі заўважаны ў горадзе вечарам 24 сакавіка. Нягледзячы на вялікую колькасць патрульных міліцыянтаў, маленькія сцяжкі з’явіліся на клумбах, на галінах дрэў.

Раніцай 25 сакавіка сотні гараджан мелі магчымасць бачыць самаробныя бел-чырвона-белыя сцяжкі і шаўковыя стужкі ў розных кутках гораду. Такім чынам нацыянальна-свядомыя гараджане адзначылі Дзень волі. На вуліцы Віленскай, Старадарожскай, Мельнічнай, Ленінскай сцяжкі віселі ў цяжка даступных месцах на галінах дрэў уздоўж праезджай часткі.

На іншых вуліцах (Жукава, Чэхава, Сацыялістычнай, М. Багдановіча) сцяжкі былі заўважаны на тумбах, дзе расклейваюць аб’явы, на слупах. У цэнтры горада, калі помніка Сафіі Слуцкай, каля будынках краязнаўчага музея красаваліся букеты кветак, абгорнутыя бел-чырвона-белымі стужкамі. Такія ж шаўковыя стужкі некаторы час луналі на агароджы мосту праз Случ, у іншых месцах. Непадалёку ад берага ракі Случ гойдаліся самаробныя караблікі з бел-чырвона-белымі сцяжкамі.

Галіна І., у мінулым настаўніца, парадавалася з’яўленню сцяжкоў у горадзе ў Дзень Волі:

Бел-чырвона-белыя сцяжкі – гэта частка нашай гісторыі, якую мы ня ведаем. Добра, што знаходзяцца людзі, якія напамінаюць пра змаганне продкаў за Волю і наш цяперашні пакутны век. Гісторыя паўтараецца. Шкада, што гэтыя прыгожыя сцяжкі доўга не павісяць і вывешваюцца ў глыбокім падполлі.

Крыніца: Беларускія рэгіянальныя навіны